ఉత్తర కొరియాపైకి డ్రోన్లు: మాజీ అధ్యక్షుడికి 30 ఏళ్ల జైలు శిక్ష

దక్షిణ కొరియా మాజీ అధ్యక్షుడు యూన్ సుక్ యోల్‌కు న్యాయస్థానంలో మరో భారీ ఎదురుదెబ్బ తగిలింది. ఉత్తర కొరియా రాజధాని ప్యాంగాంగ్‌పైకి సైనిక డ్రోన్లను పంపిన కేసులో సియోల్ సెంట్రల్ డిస్ట్రిక్ట్ కోర్టు ఆయనకు శుక్రవారం 30 ఏళ్ల జైలు శిక్ష విధిస్తూ తీర్పు వెలువరించింది. దేశంలో విధించిన మార్షల్ లా (సైనిక పాలన) విఫలం కావడంతో ఓ సాకును సృష్టించే ఉద్దేశంలో భాగంగా యూన్ ఈ డ్రోన్ల దాడికి ఆదేశించారని కోర్టు నిర్ధారించింది.

2024 అక్టోబర్‌లో చోటుచేసుకున్న ఈ ఘటనలో యూన్ పాత్ర స్పష్టంగా ఉందని న్యాయస్థానం స్పష్టం చేసింది. శత్రువులకు సహకరించడం, అధికార దుర్వినియోగం వంటి అభియోగాల కింద ఆయనను దోషిగా తేల్చింది. ఈ కేసులో యూన్‌తో పాటు మాజీ రక్షణ మంత్రి కిమ్ యోంగ్-హ్యూన్‌కు కూడా 30 ఏళ్ల శిక్ష పడగా, మరికొందరు సైనికాధికారులకు స్వల్పకాలిక శిక్షలను కోర్టు ఖరారు చేసింది.

కాగా, 2024 చివర్లో మార్షల్ లా విధించి తిరుగుబాటుకు యత్నించిన కేసులో యూన్ సుక్ యోల్ ఇప్పటికే యావజ్జీవ కారాగార శిక్ష అనుభవిస్తున్న విషయం తెలిసిందే. నాడు ఆయన మార్షల్ లా విధించారు. కానీ ప్రజాప్రతినిధులు సహా అందరి నుంచి తీవ్ర వ్యతిరేకత రావడంతో గంటల వ్యవధిలో దానిని విరమించుకున్నారు. ఈ పరిణామాల నేపథ్యంలో ఆయన అభిశంసనకు గురై పదవిని కోల్పోయారు.

ఉత్తర కొరియాను రెచ్చగొట్టి, ఆ దేశం నుంచి ప్రతిస్పందన రాబట్టేందుకే 10కి పైగా డ్రోన్లను పంపారని ప్రాసిక్యూటర్లు వాదించారు. తద్వారా ఉద్రిక్తతలు సృష్టించి, రాజకీయ ప్రత్యర్థులను దేశ వ్యతిరేక శక్తులుగా చిత్రీకరించి మార్షల్ లా విధించే పన్నాగం పన్నారని ఆరోపించారు. అయితే, యూన్ తరపు న్యాయవాదులు ఈ ఆరోపణలను తోసిపుచ్చారు. ఉత్తర కొరియా ప్రయోగించిన చెత్త బెలూన్ల వంటి కవ్వింపు చర్యలకు ప్రతిస్పందనగానే డ్రోన్లను పంపామని, ఈ తీర్పుపై అప్పీల్ చేస్తామని వారు పేర్కొన్నారు. దేశ భద్రతకు సంబంధించిన సున్నితమైన అంశం కావడంతో ఈ కేసు విచారణ చాలావరకు రహస్యంగా సాగింది.